Bavariya qiroli Lyudvig II hayotligidayoq afsonaga aylanib ulgurgandi. San’atning nozik shinavandasi, musiqa va me’morchilik bilimdoni, olijanob yigit... Ha, Bavariya taxtiga, ayniqsa, urushqoq imperiyalar gullab-yashnagan bir asrda undan ko‘ra mos kelmaydigan nomzodni tasavvur qilish qiyin. Xazinani to‘ldirishdan ko‘ra ko‘proq operaga qiziqqan kelishgan Lyudvig otasining umidlarini oqlashiga va munosib voris bo‘lishiga o‘zi ham shubha qilardi. Biroq, siyosiy o‘yinning ta’mini totib ko‘rgan Lyudvig Bavariya tarixining asosiy shaxsiga aylanadi.